Mat 22 | GAM | STEP | Iwa Kerman kambono moi al Jisas kandja buko merke dje awi. Kandja buko ta dje awo embe dji,

Matthew 22

Are God dumoye wopake yero al, yene unakiye boll kwa aike nane

(Luk 14.16-24)

1 Iwa Kerman kambono moi al Jisas kandja buko merke dje awi. Kandja buko ta dje awo embe dji, 2 God dumoye wopake kantau yendo ge embe mal yendo. Iwa king wariye ta ana ino dje yeika, kwa kerman gale yei. 3 King boiye kambono dje worika, ga po asamoll dji una moi al dje awo embe dji, kwa gapin pora dji, ye er wome! dji. Ba, una man, nawombon we dji. 4 King boiye ta alla dje worika, une po asa dji una moi al embe dji, ye pillme! No kwa kepin pora dji. Kog kau ne, wal porapora amblokun yepin pora dji. Ye er wome! dji.

5 Boiye una po dji ba, ga pille kere er yenekne kogone al pi. Ta er mauye al pika, ta yene kogoye yeno dje pille er pi. 6 King boiye wo moi ge una pende amblo ye ke kaima ye awo, to goi. 7 To golmaka, king elle kumbsika, une ami una dje worika po to goi una moi al to djerpall ye kere, numbne gullne wamo woro, ye ke ye awi.

8 King wo boiye una kambono moi al embe dji, kwa kerman kepin pora dji ba, una ge kune namoi, kwa kerman nane ge kune nayendo. 9 Ye po kondwe poke poke yero al molo una kanne ge, ye yau taneke una wo kwa kerman nane we dji.

10 Djika boiye una kondwe yei al po una porapora kani ge djimaka woi. Una ke wopake, ge porapora dji womaka, king numbiye al sill dji.

11 Una numog po kwa no molmaka, king numog po kani iwa ta moi. Une konkunom wori ge konkunom iwana bolo inj mal embe nawori. 12 King po embe dji, waria, ni konkunom iwana bolo inj mal embe naworo won ge kond namba mal ye pakna won ne? dji. Djika iwa ge kandja ta nadji. 13 King po yene boiye kambono moi al embe dji, ye iwa ge kake agle al kaye to ipo orko emill yendo al worneke moya. Una kasmane koglo, kimb kallgane ye ye yenj dumo ge moya we dji.

14 King ge embe yei pille, ye pillme! God una merke mor al yau tondo, ye er wome! djindo ba, una porapora i numog naworda. Una taimantaiman dje moye ge i numog worda we dji.

Una ku takis to gapman aune mo man?

(Mak 12.13-17 ne, Luk 20.20-26)

15 Parisi una po yenekne kandja begle, kende kulo djimbonka, Jisas kandja ta djinda ge kot ye aumbon we dji. 16 Parisi una yenekne kogone una ne, Erot wombaye kambono boll dje woro embe dji, ye Jisas moro al po embe djine, tisa, no kanmon, ni kandja kaima djinden, una kandjine paro ne, naparo una porapora ni ye kune ye aunden, ni God kandjiye kaima dje aunden una moren. 17 Ni namba we dje pren? Ni djimbenka no pupon. No ku takis Rom gapman iwa kerman Sisa aunmon ge kune yendo mo man ne? dji. 18 Ba kambono nomane ke pai ge Jisas kane embe dji, ye djillakne soka paro una mor. Naba yei pille ye na ale yeno dje pille yenj? 19 Ye ku takis tonj mal megiye ta yenda na kanno we dji. Kambono ku megiye ta i aumaka, 20 une embe dji, ku al ge iwa ta piksaye ne, kandjiye paro ge una ne kandjiye paro ne? dji. 21 Ge Rom gapman iwa kerman Sisa piksaye ne, kandjiye paro we dji. Djimaka Jisas embe dji, pora, ye Sisa wal yenda ge ye Sisa aune, alla God wal yenda ge ye God aune we dji. 22 Une kandja embe djika kambono aya dje pille, Jisas kere er pi.

Una goi ge alla agiye mo man?

(Mak 12.18-27 ne, Luk 20.27-40)

23 Sadusi una moi ge una goi ge alla agle er wo gun napine dje pi una moi. Ga Jisas dje pupon dje wo embe dji, 24 tisa, Mosis kandja Baibel al bolo nono awi ge une embe dji, una ta goya game kangill moyaka wombaye ta namoi dal, age are moya ge inda. Wombaye ta moye ge una embe djine, ge age goi wombaye mor we djine we dji. 25 No su ye kandja dje ni aumon. Kamasa, age age 7-pela moi. Agane komne ge ana ta i, ba wombaye ta namoi. Age ge goika age are ana ge i. 26 Wombaye ta namoika age ge goi. Goika embe ye molo golo pumaka ana taimane ge age age 7-pela porapora i kune yemaka, wombane ta namoi. 27 Iwa porapora golo kermaka ana ge are goi. 28 Age age 7-pela molo goi ge ana taimane porapora i kune yei. Kambono yei mal ge, ni djimbenka no pupon, are una golo agle er wo gun pine kune ge, ana taimane moi ge una ne game kaima moya ne? dji. 29 Djimaka Jisas embe dji, ye ale ye pir. Baibel kandja dji mal ye kanpol natoi; God yembe dongall paro ge ye pillpol natoi. 30 Una golo agle er wo gun pine ge, iwana bolo naine. Kupill al tau agelo mor mal embe moye. 31 Una golo agle er wo gun pine kandja ge, asa God djika pepa bolo pagi ge, ye kere nakani paro we dji. 32 God embe dji, ye kokane kamasa molo goi iwa Abram Godiye ge na moro, iwa Aisak Godiye ge na moro, iwa Jekop Godiye ge na moro, we dje pepa embe boi. God una gor Godne namoro, man. Una gun mor ge Godne moro we dji. 33 Jisas kandja embe djika una merke ge pille asall toi.

God loye asamoll paro lo

(Mak 12.28-31 ne, Luk 10.25-28)

34 Una embe dji, Jisas kandja pai mal djika Sadusi una kandja ulle ta dje yem worne napai we djimaka, Parisi una pille Jisas moi al woi. 35 Parisi iwa ta God lo pille kune yei iwa ta kende kulo Jisas ta djinda dje piyo dje pille embe dji, 36 God lo pai ge naral lo asamoll paro ne? dji. 37 Jisas embe dji, lo asamoll paro ge embe. Ye God wopake kanme! dji. Ye ellne tukne ne, nomane ne, yembene boll God wopake kaima kane gi dje molme! dji. 39 Lo are wondo ge lo asamoll paro mal embe paro. Ye yenekne kane wopake yenj mal, una ta kane wopake embe yeme! dji. 40 Kandja porapora Mosis dji mal ge ne, propet kandja asa dji mal ge, lo soka paro ge me embe mal paro we dji.

Krais ge ne mal moro?

(Mak 12.35-37 ne, Luk 20.41-44)

41 Parisi una makai to molmaka Jisas wo kambono moi al embe dji, 42 ye djine na piyo. God dje wori wonda iwa Krais we dje Baibel bolo pagi ge, una ne wariye moya ne? dji. Kambono embe dji, iwa Depit wariye moya we dji. 43 Jisas embe dji, ye embe djinj ba, God Murble Depit boll moika, yene gollye are ta moya pille Baibel bolo embe dji, ni na iwa kerman moren we dji. Dji ge namba yei pille dji? Depit embe dji, 44 God Iwa Kerman ge ye molo na Iwa Kerman moi al embe dji, ni wo na moro al manda aglena woto ami dje mopenka, na ni kunda yem una to kamblo kal worno ^{▼▼ancient time conquerers would put their feet on the necks of their enemies} we dji. 45 Jisas embe dji, iwa Depit asa moi yene gollye are moi ba, Depit yene gollye pille, ni na Iwa Kerman moren we dji ge namba yei pille dji ne? dji. 46 Jisas kandja embe djika kambono kandja ulle dje yem worne napai. Are, kandja dje pupon dje yei ge alla keri. Kand golo, nadji.